50.000 manns í Gambíu fá neyðaraðstoð frá Íslandi

8.6.2012

Ágæta Rauða kross fólk.

Meðfylgjandi er fréttatilkynning sem send var til fjölmiðla í morgun. Sendi þetta þar sem um er að ræða mjög umfangsmikið verkefni og einnig aðila sem margar deildir hafa verið í samskiptum við í gegnum vinadeildasamstarf.

Um er að ræða afar umfangsmikla neyðaraðstoð. Verið er að bregðast við miklum uppskerubresti í Gambíu sem er hluti af Sahel svæðinu í Afríku sem hefur verið talsvert í fréttum. Þó svo að löngu samstarfi við Rauða krossinn í Gambíu hafi lokið fyrir um tveimur árum, þar á meðal mörgum vinadeildaverkefnum, þá er hér um að ræða tímabundna neyð sem hægt er að milda mjög mikið með því að bregðast strax við. Ef áætlanir ganga eftir verður með þessum aðgerðum komið í veg fyrir langvarandi vannæringu meðal barna í Gambíu og jafnframt, með dreifingu útsæðis og áburðar, tryggt að fólk verði aftur sjálfbjarga með mat.

Bestu kveðjur,
Kristján


Rauði krossinn á Íslandi hefur nú í júní dreifingu á matvælum og útsæði til þeirra 50.000 manna sem verst þjást af matarskorti í Gambíu, einu fátækasta ríki heims. Neyðarástandi hefur verið lýst yfir í landinu í kjölfar meiriháttar uppskerubrests. Síðasta hrísgrjónauppskera, aðalfæða landsmanna, hrundi um nær 80% og aðaltekjulindin, jarðhneturækt, um nær 70%.

Smábörn eru í mestri hættu á að skaðast vegna matarskortsins og því er lögð áhersla á að hjálpa fjölskyldum með börn yngri en fimm ára og mæðrum sem eru með börn sín á brjósti. Gambía er minnsta land á meginlandi Afríku og tilheyrir svokölluðu Sahel svæði sunnan Sahara eyðimerkurinnar þar sem matarskortur ógnar lífi milljóna manna.

Rauði krossinn á Íslandi leiðir starf Alþjóða Rauða krossins í Gambíu. Hlér Guðjónsson, sendifulltrúi, hefur verið í landinu síðastliðnar þrjár vikur og unnið með Gambíska Rauða krossinum að þarfagreiningu og aðgerðaáætlun. Nú í vikunni tók Birna Halldórsdóttir, sendifulltrúi, við af honum og mun hún stýra neyðaraðstoð Íslands fram á haustið og sjá til þess að hún komist til skila.

Dreifing á útsæði og matvælum til þeirra rúmlega átta þúsund fjölskyldna sem mest þurfa á hjálp að halda hefst um miðjan júní. Miklu skiptir að vinna hratt til að fólk eigi að borða og möguleika á að planta útsæðinu án tafar til að tryggja sér uppskeru í haust. Uppskerubrestur og matvælaskortur í líkingu við ástandið nú hefur ekki verið í Gambíu í um 15 ár og því er þetta mikið áfall fyrir þetta litla land.

Sameinuðu Þjóðirnar segja að um 430.000 manns, þar af 74.000 börn undir fimm ára þjáist vegna mikils matvælaskorts í Gambíu. Fjöldi fólks á hvorki mat né útsæði til að planta í akra sína. Börn eru tekin úr skóla og send út að leita að mat, hvar sem eitthvað ætilegt er að finna.

Rauði krossinn á Íslandi hefur átt farsæl samskipti við Rauða krossinn í Gambíu síðastliðin 20 ár og hafa meðal annars fjölmörg íslensk ungmenni starfað þar við hjálparstarf. Gambía er minnsta landið á meginlandi Afríku, 11.300 ferkílómetrar að stærð og með 1,8 milljónir íbúa. Um 75% þjóðarinnar hafa lífsviðurværi sitt af landbúnaði. Gambía er eitt af fátækustu ríkjum heims og er í 168 sæti á lífskjaralista Sameinuðu Þjóðanna. Ísland er í 14. sæti á sama lista.

Rauði krossinn á Íslandi gerir ráð fyrir að verja alls 40 milljónum úr hjálparsjóði til neyðaraðstoðarinnar á næstu sjö mánuðum. Almenningur er hvattur til að leggja aðstoðinni lið. Það má gera á raudikrossinn.is eða með því að hringja í söfnunarsímann 904 1500 og gefa þannig 1500 krónur.